शेटफळगढे ता. 15 : पुणे जिल्हा माध्यमिक शिक्षक संघ व शिक्षिका संघ, पुणे जिल्हा शिक्षक लोकशाही आघाडी यांचे संयुक्त विद्यमाने दिला जाणारा सन २०२३ चा ‘जिल्हास्तरीय गुणवंत शिक्षक पुरस्कार’ रयत शिक्षण संस्थेचे नागेश्वर विद्यालय शेटफळगढेचे मुख्याध्यापक जे जी गावडे यांना नुकताच जाहीर झाला.
मुख्याध्यापक जे जी गावडे यांनी रयत विज्ञान परिषदेचे विभागीय सचिव म्हणून कामकाज पाहिले आहे, तसेच फिलिपाईन्स,
सिंगापूर येथील शिक्षण पद्धतीच्या अभ्यास करण्यासाठी आयोजित केलेल्या शिक्षण दौऱ्यातही त्यांचा सहभाग होता. त्यांनी दोन्ही देशात जाऊन तेथील शिक्षण पद्धती अभ्यासली आहे.विज्ञान व गणित विषयाचे ते गेल्या ३० वर्षापासून अध्यापक म्हणून काम करीत आहेत, नुकतीच त्यांची श्री नागेश्वर विद्यालय व ज्युनिअर कॉलेज शेटफळगढे विद्यालयात प्राचार्य पदी निवड झालेली आहे.
जे जी गावडे यांनी शैक्षणिक क्षेत्रात उल्लेखनीय कार्य केल्याबद्दल जिल्हास्तरीय गुणवंत शिक्षक पुरस्कार जाहीर झाला.
सदर पुरस्काराचे वितरण २४ सप्टेंबर रोजी बारामती येथे होणार आहे.
त्यांना मिळालेल्या पुरस्काराबद्दल रयत शिक्षण संस्थेचे जनरल बॉडी सदस्य हनुमंतराव वाबळे, स्कूल कमिटी सदस्य मानसिंग वाबळे, अनिल वाबळे, बाळासाहेब भोसले, मॅनेजिंग कौन्सिल सदस्य सुभाष लकडे यांनी त्यांचा विद्यालयात सत्कार केला.
