इंदापूर ता. 15 : जिल्हा परिषद पुणे व पंचायत समिती, इंदापूर मुख्यमंत्री समृद्ध पंचायतराज अभियाना अंतर्गत ग्रामपंचायत म्हसोबाचीवाडी व आयुष्यमान आरोग्य मंदिर उपकेंद्र निरगुडे यांच्या संयुक्त विद्यमानाने ॲनिमियामुक्त गाव अभियान व सर्व रोगनिदान शिबिर व उपचाराचे आयोजन करण्यात आले आहे. अशी माहिती म्हसोबाचीवाडी सरपंच राजेंद्र राऊत व ग्रामपंचायत अधिकारी सोनाली गवळी यांनी दिली.
सोमवार ( दिनांक १७) म्हसोबाचीवाडी,ता. इंदापूर येथील कवडे (पवार) महादेव मंदिर या ठिकाणी सकाळी १० वाजता ॲनिमियामुक्त गाव अभियान अंतर्गत सर्व रोगनिदान शिबिरामध्ये गरोदर माता तपासणी,पोषक आहाराचे वाटप करण्यात येणार आहे. उच्च रक्तदाब, मधुमेह व कॅन्सर इत्यादींची तपासणी व त्यावर उपचार पद्धत तसेच रक्तामधील विविध चाचण्या याची तपासणी करण्यात येणार आहे.
शिबिरात डोळ्यांची मोफत तपासणी व शस्त्रक्रिया करण्यात येणार आहे. म्हसोबाचीवाडी परिसरातील जास्तीत जास्त नागरिकांनी आणि महिलांनी या शिबिराचा लाभ घेण्याचे आवाहन करण्यात आले .
