भिगवण ता. 3 : पुणे जिल्हा क्रीडा परिषद व जिल्हाधिकारी कार्यालय पुणे यांच्या वतीने आयोजित केलेल्या तालुकास्तरीय शालेय कुस्ती क्रीडा स्पर्धेत कारंडे कुटुंबातील दोन्ही बंधूंनी इंदापूर तालुक्यात कुस्ती स्पर्धेत प्रथम क्रमांक पटकाविला.
पृथ्वीराज शिवाजी कारंडे 17 वर्षे वयोगटात व 60 किलो वजन गटात प्रथम तर ऋतुराज संपत कारंडे याने 51 किलो वजन गटात कुस्ती स्पर्धेत इंदापूर तालुक्यात प्रथम क्रमांक पटकाविला. पृथ्वीराज कारंडे हा अकरावी विज्ञान शाखेत विठ्ठलराव थोरात इंग्लिश मीडियम स्कूल भिगवन तर ऋतुराज कारंडे हा माध्यमिक विद्यालय वीरवाडी येथे दहावी इयत्तेत शिकत आहेत.
दोन्ही बंधूंनी कुस्ती स्पर्धेत मिळवलेल्या या यशाबद्दल विठ्ठलराव थोरात इंग्लिश मीडियम स्कूलचे अध्यक्ष बापूराव थोरात,सचिव विजय थोरात, माध्यमिक विद्यालय वीरवाडीचे अध्यक्ष नानासाहेब बंडगर, मुख्याध्यापक मनोहर बंडगर, क्रीडा शिक्षिका सुषमा ढवाण यांनी त्यांचे अभिनंदन केले. या दोन्ही कुस्तीपटूंची निवड जिल्हास्तरीय क्रीडा स्पर्धेसाठी झाली आहे. महाराष्ट्र उपकेसरी आबा सूळ व महाराष्ट्र चॅम्पियन दत्तात्रय गायकवाड,क्रीडा शिक्षक गणेश घुले यांचे मार्गदर्शन या विद्यार्थ्यांना वेळोवेळी लाभले.
