पुणे या.17 : पुणे जिल्हा परिषदेच्या अध्यक्ष व उपाध्यक्ष पदासाठी उद्या बुधवारी 18 मार्च रोजी निवडणूक होत आहे. जिल्हा परिषदेच्या 73 पैकी 51 जागा मिळवत राष्ट्रवादी काँग्रेसने जिल्हा परिषदे्वर एक हाती सत्ता मिळवली आहे. त्यामुळे अध्यक्ष व उपाध्यक्ष राष्ट्रवादी काँग्रेसचे होणार हे मात्र निश्चित आहे परंतु आंबेगावचे विवेक वळसे पाटील की दौंडचे वीरधवल जगदाळे अध्यक्ष होणार याकडे सर्वांचे लक्ष लागले आहे.
राष्ट्रवादी काँग्रेसचे ज्येष्ठ नेते दिलीप वळसे पाटील यांनी विधानसभा निवडणुकीनंतर सत्ता स्थापनेच्या वेळी स्वतःहून मंत्रीपद घेण्यास नकार दिला होता. त्यामुळे जिल्हा परिषद अध्यक्ष पद निवडीत ज्येष्ठतेचा विचार केला तर दिलीप वळसे पाटील यांच्या शब्दाला मानाचे स्थान आहे. अशातच वळसे पाटील यांचे पुतणे विवेक वळसे पाटील यांनी या अगोदरच जिल्हा परिषदेचे उपाध्यक्ष पद भूषवलेले आहे त्यामुळे अनुभवी चेहरा म्हणून विवेक वळसे पाटील यांना अध्यक्ष पदावर काम करण्याची संधी दिली जाण्याची शक्यता व्यक्त केली जात आहे.
याशिवाय सध्याच्या राजकीय परिस्थितीचा विचार करता जिल्ह्यातील अथवा राज्यातील एकही महत्त्वाचे पद शिरूर लोकसभा मतदारसंघात नाही. त्यामुळे संपूर्ण जिल्ह्याचा राजकीय विचार करून या अध्यक्षपदावर वळसे पाटील यांना काम करण्याची संधी दिली जाण्याचे जवळपास निश्चित आहे.
तसेच दौंडचे वीरधवल जगदाळे यांनाही जिल्हा परिषदेचे कामकाजाचा मोठा अनुभव आहे. त्यामुळे त्यांच्या ज्येष्ठतेचा विचार करता श्री जगदाळे यांना पहिल्यांदाच उपाध्यक्षपदी काम करण्याची संधी पक्षाच्या वतीने दिली जाण्याची शक्यता राजकीय वर्तुळातून व्यक्त केली जात आहे.
अशातच सध्या राज्याच्या उपमुख्यमंत्री सुनेत्रा पवार कृषी मंत्री दत्तात्रय भरणे जिल्हा बँकेचे अध्यक्ष दिगंबर दुर्गाडे या पदावर कार्यरत असणाऱ्या व्यक्ती बारामती लोकसभा मतदारसंघात येतात त्यामुळे या मतदारसंघात अध्यक्ष पद मिळण्याची शक्यता नाही.
राज्याचे दिवंगत उपमुख्यमंत्री अजित पवार यांच्या निधनानंतर आगामी काळात पक्ष वाढीच्या धोरणाचा विचार करून सर्वांना विश्वासात घेऊनच जिल्हा परिषदेचा अध्यक्ष व उपाध्यक्ष ही दोन्ही पदे द्यावी लागणार आहेत.
त्यामुळे श्री वळसे पाटील व श्री जगदाळे यांची नावे अध्यक्ष व उपाध्यक्ष पदासाठी आघाडीवर असली तरी पक्षश्रेष्ठी कोणाला कोणत्या पदावर काम करण्याची संधी देणार की आणखी नवीन चेहरा पुढे करणार ? याकडे जिल्ह्याचे लक्ष लागले आहे.
