इंदापूर ता.20 :म्हसोबावाडी (ता. इंदापूर ) येथील ग्रामदैवत यशवंतरायाच्या उत्सवाचे 22 ते 24 ऑक्टोबर रोजी आयोजन करण्यात आले आहे.
बुधवारी 22 ऑक्टोबरला दीपावली पाडव्याच्या दिवशी पहाटे निरा व भीमा नदीवरून आणलेल्या पाण्याने यात्रा स्थळावरील यशवंतरायास जलस्नान घातले जाणार आहे. त्यानंतर सकाळी दहा वाजता यशवंतरायाच्या लग्नाचा कार्यक्रम होणार आहे.
त्यानंतर दुपारी 12 वाजता गावातील यशवंतरायाच्या मंदिरातील देवाची पालखी यात्रा ठिकाणी ओढ्याच्या तीरावरती असलेल्या यशवंतरायाच्या मंदिराकडे जाण्यासाठी उंच कावडीसह वाजत गाजत निघणार आहे. दरम्यान याच मार्गावर आदराई देवीच्या तळावर देवाचे धार्मिक कार्यक्रम होणार आहेत.
त्यानंतर यात्रा स्थळावरील मंदिरात रात्रभर धार्मिक कार्यक्रम होणार आहेत.
गुरूवार 23 ऑक्टोबर रोजी उत्सवाच्या मुख्य दिवशी दिवसभर धार्मिक व मनोरंजनाचे कार्यक्रम होणार आहेत. तसेच चार वाजता कुस्त्यांचा आखाडा संपन्न होणार आहे. त्यानंतर याच रात्री यशवंतरायाची पालखी गावातील मंदिराकडे जाण्यासाठी निघणार आहे.
परतीच्या मार्गावर रात्रभर अंदराई देवीच्या तळावर धार्मिक कार्यक्रम होणार आहेत.
त्यानंतर शुक्रवारी 24 ऑक्टोबरला लक्ष्मी माता मंदिर तळावर सकाळी धार्मिक कार्यक्रम होणार आहेत. त्यानंतर येथून वाजत गाजत गावच्या मंदिरात दुपार नंतर देवाची स्थापना केल्यानंतर यात्रेची सांगता होणार आहे.
यात्रा काळात बिदाल (ता. माण) काराटी, सावळ, जैनकवाडी ( ता. बारामती ) या गावातील देवाचे सबिने या यात्रेत सहभागी होणार आहेत.
———————————–
