भवानीनगर ता. 29 : सर्वांचे लक्ष लागून असलेल्या भवानीनगर येथील श्री छत्रपती सहकारी साखर कारखान्याच्या पंचवार्षिक निवडणुकीसाठी थकबाकीदार सभासदांचा मुद्दा निकाली निघाला असून याही सभासदांना मतदानाचा हक्क मिळाला आहे.
त्यामुळे या सभासदांच्या दृष्टीने ही न्यूज ठरली आहे. त्यामुळे कारखान्याच्या आगामी निवडणुकीसाठी 22 हजार 515 मतदार आपल्या मतदानाचा हक्क बजावणार आहेत.
कारखान्याच्या 12 जुलै रोजी प्रसिद्ध झालेल्या प्रारूप मतदार यादीवर 20 जुलै पर्यंत देण्यात आलेल्या मुदतीत 595 हरकती दाखल झाल्या होत्या. हरकतींची संख्या ही जास्त असल्याने 21 जुलैपासून प्रत्यक्षात सुनावणीला सुरुवात झाली होती .
अखेरीस या हरकतींची सुनावणी 28 जुलैला पूर्ण झाली होती. त्यामुळे या निकालाकडे कारखान्याच्या सभासद मतदारांचे लक्ष लागले होते. अखेरीस 28 जुलै 2023 रोजी या हरकतींवर अंतिम निकाल देण्यात आला आहे
निवडणूक निर्णय अधिकारी यांच्या वतीने छत्रपती कारखान्याच्या निवडणुकीसाठी संचालक मंडळाने सादर केलेली यादी ग्राह्य धरण्यात आली आहे. तर 595 हरकती पैकी थकबाकीदार सभासदांना अपात्र करण्याचा मुद्दा निकाली निघाला यामध्ये केवळ मयत 475 सभासदांना वगळण्याचा आदेश या निकालांमध्ये नव्याने करण्यात आला आहे.
त्यामुळे 22 हजार 990 मतदारांपैकी 22 हजार 515 मतदार आता या निवडणुकीत भाग घेऊ शकतील असा आदेश देण्यात आला आहे. मात्र हा निर्णय मान्य न झाल्यास पुन्हा न्यायालयात आव्हान दिले जाण्याची शक्यता आहे.
जर थकबाकीदार सभासदांना मतदानाचा अधिकार मिळाला नसता तर जवळपास 13 ते 14 हजार मतदार कमी होऊन केवळ आठ हजार मतदारच कारखान्याच्या निवडणुकीसाठी मतदानाला पात्र ठरले असते.
परंतु थकबाकीदार सभासदांचा मुद्दा निकाली निघाल्याने व त्यांना मतदानाचा अधिकार प्राप्त झाल्याने या मतदारसंघांसाठी हा दिलासा मानला जात आहे
नियोजित तारखेनुसार येत्या दोन ऑगस्ट रोजी कारखान्याच्या पंचवार्षिक निवडणुकीसाठी अंतिम मतदार यादी प्रसिद्ध होणार आहे . ही यादी प्रसिद्ध झाल्यानंतर कोणत्याही क्षणी कारखान्याच्या पंचवार्षिक निवडणुकीचा कार्यक्रम जाहीर होण्याची शक्यता आहे.
——————————–