पुणे ता. 24 : राज्यातील सर्व जिल्हा परिषद अंतर्गत गट ‘क’ संवर्गातील 19 हजार 460 पदांच्या साठी अर्ज करण्यास केवळ दोन दिवसाचा कालावधी उरला आहे येत्या 25 ऑगस्टपर्यंत उमेदवारांना अर्ज करता येणार आहेत ‘त्याचाच एक भाग म्हणून पुणे जिल्हा परिषदेत जवळपास एक हजार पदांची भरती होणार आहे
ग्रामविकास विभागांतर्गत राज्यातील सर्व जिल्हा परिषद अंतर्गत गट ‘क’ मधील सरळसेवेची आरोग्य विभागाकडील १०० टक्के व इतर विभागाकडील ८० टक्के रिक्त पदे सरळसेवेने भरण्याची पाच ऑगस्टपासून कार्यवाही सुरू करण्यात आली आहे. त्यानुसार राज्यातील ३४ जिल्हा परिषदांमधील गट-क मधील ३० संवर्गांतील एकूण १९ हजार ४६० पदे सरळसेवेने भरणेबाबतची जाहिरात ५ ऑगस्ट २०२३ रोजी प्रसिद्ध झाली आहे.
माहे मार्च २०१९ मध्ये सर्व जिल्हा परिषदांकडील गट-क मधील १८ संवर्गातील रिक्त पदे भरण्याबाबत जाहिरात प्रसिद्ध करण्यात आली होती. दरम्यान लोकसभा व विधानसभा निवडणूक आचारसंहिता, कोरोना विषाणू प्रादुर्भावाच्या पार्श्वभूमी व इतर विविध कारणांमुळे परीक्षा होऊ शकली नाही. यानंतर शासनाच्या विविध विभागाद्वारे प्राप्त झालेल्या सूचनांनुसार ग्रामविकास विभागांतर्गत ही मेगा भरती करण्यात येत आहे.
५ ऑगस्ट २०२३ ते २५ ऑगस्ट २०२३ या कालावधीत उमेदवारांकडून अर्ज स्वीकारण्यात येतील. इच्छुक व पात्र उमेदवारांना ज्या जिल्हा परिषदेमध्ये अर्ज करावयाचा आहे, त्या जिल्हा परिषदेच्या संकेतस्थळावर जाऊन २५ ऑगस्ट २०२३ पर्यंत ऑनलाईन पद्धतीने अर्ज करावा लागेल.
जाहिरातींच्या अनुषंगाने रिक्त पदांचा तपशील, पदांकरिता आवश्यक शैक्षणिक अर्हता, वेतनश्रेणी, वयोमर्यादा, परीक्षा शुल्क, ऑनलाईन अर्ज करण्याची पद्धत, अर्ज करण्याची मुदत व इतर आवश्यक अटी व शर्ती इत्यादी बाबीची माहिती संबंधित जिल्हा परिषदेच्या संकेतस्थळावर पाहण्यास उपलब्ध करून देण्यात आली आहे.
———————————–