इंदापूर ता. 16 : रथसप्तमी हा दिवस प्रवासी दिन म्हणुन दरवर्षी अखिल भारतीय ग्राहक पंचायत यांच्या वतीने साजरा केला जातो.
यावेळी देखील दिनांक 16 फेब्रुवारी 2024 सकाळी 10:00 वा. भिगवण येथे राष्ट्रीय महामार्गावर सार्वजनिक प्रवासी वाहतुकीचा वापर करणार्‍या प्रवाशांना तिळगूळ, पाणी बॉटल, गुलाब पुष्प आणि सुरक्षित प्रवासाची माहिती पत्रके वाटप करून चालक वाहकांचा सत्कार करण्यात आला. वाहतुक सुरक्षेसाठी माहिती पुस्तिका देण्यातआली.
जगाचा आदि प्रवासी असणाऱ्या सूर्यदेवतेचा दक्षिणायन आणि उत्तरायण प्रवास सुरु असणाऱ्या रथसप्तमी निमित्ताने अखिल भारतीय ग्राहक पंचायत भिगवण पोलीस ठाणे , RTO विभाग बारामती तसेच इंदापूर राज्यपरिवहन आगाराच्या वतीने पुणे सोलापूर महामार्गावर बस मधील प्रवाश्यांचे तिळगुळ आणि गुलाबपुष्प देवून स्वागत करीत प्रवासी दिन साजरा करण्यात आला.
देशातील नागरिकांनी प्रवास करताना खासगी वाहतुकीच्या ऐवजी सार्वजनिक वाहतूक व्यवस्थेचा पर्याय अंगीकारावा . तसेच सार्वजनिक वाहतूक व्यवस्था सुधारावी यासाठी अखिल भारतीय ग्राहक पंचायत यांच्यावतीने हा आगळावेगळा कार्यक्रम प्रत्येक वर्षी आयोजित करण्यात येतो .
आज राबविण्यात आलेल्या या कार्यक्रम प्रसंगी भिगवण पोलीस ठाण्याचे नवनियुक्त सहाय्यक पोलीस निरीक्षक संदेश बावकर ,मोटार वाहन निरीक्षक नितीन घोडके ,मोटार वाहन निरीक्षक निरंजन पूनसे , सहा.मोटर वाहन निरीक्षक शुभम तांगडे ,प्रज्ञा ओमासे , प्रियांका कुडले , राज्य ग्राहक संरक्षण परिषदेचे तुषार झेंडेपाटील, जिल्हा ग्राहक संरक्षण सदस्य दिलावर तांबोळी , प्रवासी महासंघाचे नंदकुमार तावरे ,राजेंद्र निंबाळकर, पांढरमिसे, तसेच रा.प.वाहतूक नियंत्रक नंदकुमार राउत उपस्थित होते.
यावेळी पुणे सोलापूर महामार्गावरील प्रवास करणाऱ्या अक्कलकोट दादर एस.टी बसला थांबवून या गाडीचे चालक आणि वाहक यांचा फेटा बांधून सत्कार करीत बस मधील प्रवाशी यांना पाणी बाटली तसेच तिळगूळ तसेच गुलाबपुष्प देवून स्वागत करण्यात आले.
पोलीस अधिकारी संदेश बावकर आणि झेंडेपाटील यांनी एसटीबस मधील प्रवासी यांचे स्वागत करीत राज्य परिवहन बसने प्रवास सुरक्षित असून जास्तीत जास्त सार्वजनिक प्रवासी वाहतुकीचा अवलंब करण्याचे आव्हान केले आहे. राज्य परिवहन महामंडळाने देखील अधिक चांगल्याप्रकारे प्रवाशांना सेवा उपलब्ध करून देण्यात येत आहे तसेच नागरिकांनी सार्वजनिक वाहतूक व्यवस्थेचा लाभ घेतल्यास अपघात प्रमाण कमी होण्यास मदत होणार असल्याचे सांगितले.
यावेळी मराठी पत्रकार संघाचे मार्गदर्शक नारायण मोरे ,हरिओम ज्वेलर्सचे संचालक मनोज उदावंत ,औदुम्बर हुलगे , जनार्धन पांढरमिसे ,स्वप्नील सूर्यवंशी ,राहुल सोनवणे उपस्थित होते.
