शेटफळगढे: ता. 12 : रयत शिक्षण संस्थेचे, श्री नागेश्वर विद्यालय ज्युनिअर कॉलेज शेटफळगढे विद्यालयातील विद्यार्थ्यांनी अटल टिंकरींग लॅब मध्ये साहित्याचा उपयोग करून ड्रोन तयार केला.या परिसरातील व ग्रामीण भागातील विद्यार्थ्यांनी बनवलेला हा पहिलाच ड्रोन यशस्वी झालेला असून विद्यार्थ्यांचे परिसरात कौतुक होत आहे.
विद्यालयाचे प्राचार्य बी आर भिसे यांच्या मार्गदर्शनाखाली विद्यालयाचे शिक्षक राम तांबे यांच्या प्रयत्नातून विद्यार्थ्यांनी हा ड्रोन बनविला. सध्याचे युग हे विज्ञान तंत्रज्ञानाचे युग असून शेटफळगढे ता इंदापूर सारख्या ग्रामीण भागातील विद्यार्थ्यांनी ड्रोन, स्मार्ट डस्टबिन,आय ब्लिंक सेंसर, थ्रीडी प्रिंटरच्या मदतीने अनेक मुर्त्या,सोलर गाडी यांसारख्या इलेक्ट्रॉनिक्स वस्तू बनवलेल्या आहेत.
विद्यालयात अटल टिंकलिंग लॅब असून या प्रयोगशाळेचा विद्यार्थी पुरेपूर वापर करीत आहेत. या लॅबच्या माध्यमातून सध्या अनेक विद्यार्थी संशोधन करीत असून लॅबच्या साहित्याचा पुरेपूर उपयोग करीत आहेत.
विद्यालयातील उपशिक्षक राम तांबे यांच्या मार्गदर्शनाखाली हे विद्यार्थी प्रचंड वेळ देऊन लॅबमध्ये संशोधन करीत असल्याने हे यश मिळू शकले.
प्रणव सूर्यवंशी, समर्थ माळवे,अभिराज चोरमले,वैष्णव होलम राजवर्धन वाबळे या विद्यार्थ्यांनी हे ड्रोन बनवले असून त्यांचे सर्वत्र कौतुक होत आहे.
विद्यालयाचे प्राचार्य बी आर भिसे, मॅनेजिंग कौन्सिल सदस्य सुभाष लकडे, जनरल बॉडी सदस्य हनुमंतराव वाबळे, स्कूल कमिटी सदस्य मानसिंग वाबळे, अनिल वाबळे, बाळासाहेब भोसले,सरपंच व ग्रामस्थांनी पालकांनी विद्यार्थी व शिक्षकांचे अभिनंदन केले.
चौकट: भविष्यकाळात रयत शिक्षण संस्था व
नागेश्वर विद्यालयाच्या नावे पेटंट निर्माण व्हावे असे दर्जेदार संशोधन विद्यार्थी करतील यासाठी आम्ही प्रयत्नशील आहोत असे मत विद्यालयाचे प्राचार्य यांनी यावेळी व्यक्त केले.
